LAOAG CITY – Nauram ti agarup 25 nga ektaria a kabanbantayan iti nagbedngan iti ili ti Marcos ken Dingras.
Segun ken ni Barangay Chairman Teddy Rosqueta, ti Barangay Cali iti ili ti Dingras, nangrugi ti uram iti paset ti Barangay Mabuti iti ili ti Marcos agingga a nagramram daytoy a nakadanon iti sakupen ti barangayda.
Inbatadna a basar iti inisyal nga imbestigasion dagiti otoridad, posible a dagiti agal-ala ti itlog ti abuos ti adda iti likudan ti insidente.
Inlawlawagna a mabalin a nagpuor dagiti maseknan tapno maalada ti itlog dagiti abuos ken maipagarup a binaybay-anda daytoy nga agap-apoy pay laeng.
Kunana nga alisto a nagramram ti apoy gapu kadagiti nagango a ruot ken bulbulong iti kabanbantayan.
Mainaig iti daytoy, insigida a nagresponde ti Bureau of Fire Protection, Philippine National Police, Philippine Army pakairamanan dagiti barangay officials a nagtitinnulong iti panagsebseb ti apoy.
Innayon ni Kapitan Rosqueta a gapu iti napasamak ket kalikagumda a paayaban dagiti agal-ala ti itlog ti abuos iti kabanbantayan tapno maipakaammo ti rumbeng nga aramidenda ken maliklikan ti uram.
Kabayatanna, naammoan a nangrugi ti uram idi malem kalman ken naan-anay a nasebseban ti apoy iti agarup alas dose ti rabii.
