LAOAG CITY – Dumanon iti 252 a pagtaengan iti rehion uno ti nadadael gapu iti iduduprak ti Bagyo Marce.
Segun ken ni Mr. Adreanne Pagsolingan, Information Officer ti Office of the Civil Defense ti rehion uno, kadagupan iti nasao a bilang ket adda ti 247 a partially damaged idinto a lima met ti totally damaged manipud iti probinsia ti Ilocos Norte ken Ilocos Sur.
Inbatadna a dumanon iti 1,418 a pamilia ti naapektaran gapu iti nasao a bagyo no sadinno a bukbuklen daytoy ti 4,055 nga indibidual.
Inlawlawagna nga adda ti 381 a pamilia ti nagtalinaed pay laeng kadagiti evacuation center idinto nga adda ti 41 a pamilia ti temporario a nakitarus kadagiti pagtaengan dagiti kabagianda.
Kunana nga adda ti naawatda a report nga adda ti maysa a nasugatan ken maysa a mapukpukaw ngem manarimaan pay laeng ti panangberipikarda daytoy no adda ti pakainaiganna iti Bagyo Marce.
Innayonna a naideklara iti ili ti Pagudpud iti State of Calamity gapu iti kinapigsa ti epekto ti Bagyo Marce.
Iti agdama, manarimaan pay laeng ti panang-consolidate ti Office of the Civil Defense – Region I ti balor dagiti nadadael iti benneg ti agrikultura ken imprastraktura.
