LAOAG CITY – Kiniddaw ti International Criminal Court (ICC) Prosecution nga ibasura ti kiddaw ni dati a Presidente Rodrigo Duterte a palubusan nga iapela ti desisyon ti korte a mangkumkumpirma kadagiti kaso kontra kenkuana mainaig ti maipagarop nga extrajudicial killings idi daytoy ti mayor ti Davao City ken iti panawen a nagtugaw a presidente ti Pilipinas.
Iti maysa a 12 a pinanid ti dokumento a napetsaan ti Mayo 4, inpetteng ti Prosecution iti ICC Pre-Trial Chamber I nga awan ti baro nga inpasango ni Duterte ken ti apela da ket nakaibasar laeng ti maipagarop a saan a panangpabor iti desisyon ti korte.
Inpetteng pay ti prosekusyon a saan nga usto ti interpretasyon ti kampo ni Duterte iti nagbalin a desisyon ti ICC, aglalo iti isyu ti charges.
Segun pay iti prosekusyon, nalawag a trinatar ti korte dagiti detalye ti kaso ken dinengngeg dagiti argumento ti agsumbangir a partido a nangiparuk-at ti desisyon.
