LAOAG CITY – Dimmalan iti test ti dua a residente ti Singapore para iti hantavirus kalpasan ti cruise outbreak.
Basar iti drone view ti cruise ship nga MV Hondius a nakalugan dagiti pasahero a mapagat-atapan a naapektaran ti hantavirus a naggapu iti Praia, Cape Verde.
Inbatad ti Communicable Diseases Agency, dimmalan iti isolation ken testing ti dua a residente ti Singapore a naglugan iti cruise ship a maipagarup a naapektaran ti makapatay a virus.
Mainaig iti daytoy, naiget a banbantayan dagiti dadduma a pagilian ti panagserrek dagiti pasahero iti pagilianda tapno maliklikan ti posible a panagwaras ti hantavirus.
Maipalagip a natay ti tallo nga indibidual a pakairamanan ti agasawa a Dutch ken German national gapu iti hantavirus a naglugan iti MV Hondius idinto a ti walo a dadduma pay ket mapapati a naapektaran ti virus.
Ti hantavirus ket naidumduma a sakit a mabalin a mangitunda ti nakaro a respiratory illness ken maiyakar iti babaen ti angin a kontaminado manipud iti isbo wenno rugit ti bao ken saan met nga alisto a maiyakar manipud iti maysa a tao iti pada a tao.
Naammoan a ti dua a lallaki a residente ti Singapore nga agtawen ti 67 ken 65 ket na-isolate iti National Centre for Infectious Diseases.
