LAOAG CITY – Natay ti agasawa a nakamotorsiklo kalpasan a dimmungpar kadakuada ti maysa a Fortuner iti paset ti national highway iti Barangay Bungcag iti ili ti Dingras.
Segun ken ni P/Maj. Norman Pentang, Hepe ti Dingras Municipal Police Station, ti nangiturong ti Black Fortuner ket agtawen ti 21, college student ken residente ti Barangay Laureta iti ili ti Solsona.
Inbatadna a ti nangiturong ti kurong- kurong nga Honda TMX 155 ket agtawen ti 21, awanan asawa ken residente ti Barangay Madamba iti ili ti Dingras.
Inlawlawagna a dagiti biktima nga agasawa a nakamotorsiklo a Rusi-Macho TC-125 ket agtawen ti 33, mannalon ken ti asawana nga agtawen ti 31, housewife nga agpada dagitoy a residente ti Barangay Capasan iti ili ti Dingras.
Mainaig iti daytoy, kuna ni P/Maj. Pentang a basar iti inwayatda nga imbestigasion, kabayatan a dumaldalyasat ti Fortuner iti national highway nga agturong nga agpa-laud ket nadungparna ti kurong-kurong.
Gapu iti daytoy, napukawan ti kontrol ti manibela ti driver ti Fortuner rason a napan daytoy iti sabali a linya iti kalsada no sadinno a nadungparna pay ti sumungsungad a nakamotorsiklo.
Naammoan a saan a naan-ano ti driver ti Fortuner, nagsagaba met ti sugat iti nagduduma a paset ti bagi ti driver ti kurong-kurong pakairamanan dagiti tallo a kaduana a nakalugan idinto a dagiti agasawa a nakamotorsiklo ket naideklarar a dead on arrival.
