LAOAG CITY – Mabalin a saan a naala ti umuna a kaso ti hantavirus kabayatan nga adda iti cruise ship nga MV Hondius.
Daytoy ket basar iti maysa nga eksperto manipod iti World Health Organization (WHO).
Segun ken ni Anais Legand, technical expert on viral hemorrhagic fevers iti World Health Organization, ti incubation period iti sakit wenno panawen manipod ma-impeksyon ken iti panangrugi a rumuar dagiti sintomas ket adda iti nagbaetan ti maysa ken innem a lawas.
Iti kaso ti agtawen ti 70 a Dutch national passenger, a maysa kadagiti walo a kumpirmado ken mapagat-atapan a kaso ti hantavirus, nga immuna a nagsakit, nangrugi a nakitaan kadagiti sintomas kas ti gurigot, panagsaksakit ti ulo, ken mild diarrhea idi Abril 6, kalpasan na ket nagpasar ti respiratory distress idi Abril 11 ken pimmusay kabayatan nga adda iti barko iti kapada nga aldaw.
Gapu iti daytoy, ti umuna a kaso ket possible a saan a naimpeksyon iti barko wenno maysa kadagiti isla nga agturong iti Cape Verde.
Ti nasao a Dutch national ket nalawag a naadaan ti exposure a maipagarop a konektado iti rodent wenno bao sakbay pay a naglugan iti barko.
Kabayatanna, agdama nga aglaylayag ti barko nga agturong iti Canary Islands ti Spain kalpasan ti tallo nga aldaw a panagtalinaed na iti asideg ti Cape Verde sipud pay idi domingo.
