LAOAG CITY – Naireklamo dagiti agasawa gapu iti maipagarop a panangikaw-kawar da ti kabbalay da a menor de edad idiay Hawaii.
Daytoy ti report ni Bombo International News Correspondent Manny Pascua iti Hawaii.
Inbaga ni Pascua a nabigbig dagiti agasawa nga isuda Alexander Aquino, agtawen ti 47 ken ni Aimee Aquino, agtawen ti 37, residente iti Kona, Big Island Hawaii.
Kuna na a sumangsango ita dagiti agasawa iti kaso a 1st Degree Unlawful Imprisonment ken mapaneknekan a guilty dagitoy ket mabalin a mabalud da iti saan a nababbaba ngem 10 a tawen.
Iti agdama, ti nasao a menor de edad ket adda iti kustodyar ti Child Welfare Services idiay Hawaii.
Inpakaammo ni Pascua a maak-akusaran dagiti agasawa nga Aquino nga ikawkawar da ti agtawen ti 14 a menor de edad tunggal pumanaw da ngem naiget a naglikudan daytoy dagiti maseknan.
Innayon na a temporaryo pay laeng a nawaya-wayaan dagiti agasawa ngem naiget ti pannakamonitor da ken sumango danto manen ti korte intono enero 2022.
