LAOAG CITY – Nagpalagip ni Brgy. Chairman Rodel Legazpi iti Brgy. 34-B Gabu Norte ditoy siudad ti Laoag kadagiti kabaragayanna a liklikan ti iligal a panagkalap.
Daytoy ket kalpasan nga adda dagiti agassawa a kabarangayanna ti natiliw dagiti otoridad gapu iti panagibiahe ti ikan a nakalap babaen iti iligal a wagas.
Basar iti immunan a report dagiti otoridad, nakaawat da ti impormasyon nga adda dagiti mangngalap iti nasao a barangay ti agisaysayangkat ti iligal a panagkalap.
Gapu iti daytoy, dagus a naiyuswat ti operasyon babaen kadagiti kameng ti PNP-Laoag ken City Agriculture Office.
Kabayatanna, iti pannakaiyuswat ti operasyon nasalamaan dagiti agassawa iti Brgy. Cavit ditoy met laeng siudad ti Laoag bayat a nakalugan da iti tricycle ken nagkarga dagitoy iti “BILIS” nga agdagsen ti agarup 25 a kilo.
Naiyuswat ti on the spot scientific examination babaen ken ni Mr. German D. Fermin, Senior Agriculturist ken Fish Examiner iti City Agriculture Office ditoy siudad ken naduktalan a dagiti ikan ket nakalap babaen iti panagpabettak iti uneg ti baybay.
Malaksid kadagiti bilis a mapatta-patta nga agbalor ti 3,000 apisos ti nakumpiskar manipod kadagiti agassawa ket karaman a naipan iti kustodyar dagiti otoridad ti tricycle ken pagkiloan.
Naamoan a napilaan dagiti agassawa ti kaso a panaglabsing iti section 126 ti R.A. 10654.
