LAOAG CITY – Simmuko iti Ilocos Norte Police Provincial Office (INPPO) dagiti agkabsat a taga Carasi, Ilocos Norte a kameng ti New People’s Army (NPA) kagiddan ti pannakaselebrar ti maika-52 nga anibersaryo ti CPP-NPA.
Naamoan a ti maysa ket agtawen ti 15 idi nakikappeng iti NPA nga ita ket agtawenen ti 45 idinto a ti kabsat na ket agtawen ti 20 idi simrek ken agtawen itan ti 50.
Segun ken ni Provincial Director Christopher Abrahano, adda ti ipaay da a tulong para kadagiti agkabsat a simmuko.
Inbaga na nga adda ti integration program ti gobierno a kayat na a sawen a malaksid iti ipaay da a tulong ket adda ti lokal a gobierno ken dadduma nga ahensya ti gobierno a mabalin a mangipaay ti ayuda para kadagiti maseknan.
Kabayatanna, inistorya ti maysa a ti nangallukoy kenkuana a simrek iti NPA ket ti agnagan Ka-Monching a mangidadaulo iti grupo a YP no sadinno a ti nangiduron met kenkuana a simmurot ket gapu iti kinarigat ti panagbiag.
Inistorya met ti maysa a ti kangrunaan a nangiduron kenkuana a simrek iti NPA ket gapu iti maipagarop a saan a napintas a panangtrato kadakuada dagiti soldado.
Inlawlawag na a no saan da laeng a makita dagitoy iti uneg ti 30 a minutos ket sabalin ti panpanunuten wenno pangipapanan da.
Inpakaammo ti maysa kadagiti simmuko a narigat ti panagbiag da iti banbantay gapu ta uray no agtudtudo wenno agbagbagyo ket magmagna da ken adda dagiti gundaway nga awan pay ti kanen da.
Ti maysa kadagiti simmuko ket adda ti maysa a paltog nga insuko na kadagiti otoridad.
Kabayatanna, ginutigot dagiti agkabsat dagiti dati a kakadwa da a nasaysayaaten no bumaba ken sumuko da metten iti gobierno tapno agbiag dan a normal.
