LAOAG CITY – Agkakadakkel ti premyo a naipaay kadagiti nangabak iti “investment video contest” nga insayangkat ti Invest Office ti Provincial Government of Ilocos Norte.
Inbatad ni Mrs. Rona Leigh Bueno, mangidadaulo ti Investment Office ti gobierno probinsial a limapulo ribu a pisos ti premyo ti nakagun-od iti umuna a gunguna, tallopulo ribu a pisos iti maikadua a gunguna ken duapulo ribu a pisos ti maikatlo a gunguna.
Malaksid iti daytoy, inpakaammona a naipaayan amin dagitoy ti tropio ken certificate of recognition.
Naiyalat ni Czarina Turda ti umuna a gunguna, maikadua ni Edsel Harry Turda ken ti maikatlo ket ni Gniro Vinz Pablo.
Inlawlawag ni Bueno a malaksid iti premyo dagiti nangabak ket nangipaay pay ti gobierno probinsial ti “seed capital” kadagiti amin a kualipikado.
Kunana a napanunutanda ti nangisayangkat iti nasao a pasalip tapno maammoan no ania ti kapanpanunutan dagiti agtutubo no ania ti kasayaatan a wagas a panangitandudo ti Ilocos Norte a maysa a lugar a napintas a pangipasdekan ti negosio.
Innayonna a dagiti video nga inaramid dagiti nangabak ti mapagbalin nga investment video a pangallukoy kadagiti agpupuunan nga umay mangiyestablisar ti negosioda ditoy probinsia.
