LAOAG CITY – Kinumpirmaran ni Barangay Chairman Rodolfo Ramirez iti Barangay 55-B, Salet Bulangon ditoy ciudad ti Laoag nga agkakapamilya dagiti nagpositibo iti barangay da.
Segun kenni Ramirez, sakbay daytoy ket napan nagpa-check up ti maysa kadagiti maseknan gapo iti panaggurigor ken panaguyek na.
Inlawlawag na a dimmalan iti antigen test ket positibo ti resulta na rason a dimmalan pay dagiti kapamilya na iti swab test ket positibo met resulta dagitoy.
Gapo iti daytoy, kunana a dagus a nai-lockdown ti pagtaengan ti nasao a pamilya.
Kunana nga awan met ti nakapulpulapol dagitoy gapo ta saan da unay a rumrumuar malaksid iti ama ti pamilya nga agserserbi iti gobierno.
Mainaig iti daytoy, kunana nga awan ti problema a makita da iti nalockdown a pamilya ken naiget ti panagbantay da kasta pay a nasayaat met ti pannakikooperar dagiti pasyente.
