LAOAG CITY – Natiliw dagiti aglive-in partner iti naiyuswat a drug buy-bust operation iti paset ti Barangay 7-B ditoy ciudad ti Laoag.
Nabigbig dagitoy nga isuda Jasper Ramos, agtawen ti 21, taga Brgy. Tatalon, Quezon City ken ti live-in partner na a ni Kyla Mae Laureta, agtawen ti 20, taga Brgy. Manalpac iti ili ti Solsona, ngem agdama dagitoy nga agkaskasera iti Barangay 7-B ditoy ciudad.
Kinemmeg dagiti otoridad dagiti aglive-in partner kalpasan a naglako da ti maysa a sachet a naglaon ti maipagarop a shabu.
Iti panagsukimat dagiti otoridad iti sling bag ti babai ket adda pay ti naala da a 5 a sachet nga agdagsen ti 1.9 a gramo ti maipagarop a shabu ken ti 500 a pisos kas buy-bust money.
Ipetpetteng met ti suspek a babai a saanda a bagi dagiti naala nga ebidensya kontra kadakuada gapu ta awan pulos ti kwarta da ken saan da pay a nangnangan isut gapuna a masdaaw no apay nga adda ti kwarta iti sling bag na idi sukimaten dagiti otoridad.
Inlawlawag pay ni Laureta a tallo nga aldaw da paylaeng nga agkaskasera ngem makabolan dan ditoy ciudad ti Laoag gapu ta nakipagnaed da nga immuna kadagiti barkada da.
Innayon na a nagturong da ditoy ciudad ti Laoag tapno umayda agbiruk ti pagtrabahoan da iti live-in partner na.
Kabayatanna, inbatad ni Barangay Chairman Joey L. Agliam iti Brgy. 7-B ditoy ciudad ti Laoag a dagiti suspek ket karaman iti grupo dagiti agtutubo a kinamat da iti kallabes gapu ta maipagarop a dagitoy ket nagtakaw ken nagnaed nga immuna dagitoy iti maysa a naabandonar a balay.
Mainaig iti daytoy, kuna met akin-bagi iti pagkaskaseraan dagiti aglive-in partner a pinastrek na dagitoy gapu ta nagpapakaasi da nga awan pagyanan da.
