LAOAG CITY – Nagballigi dagiti kameng ti Philippine National Police (PNP) a nangtiliw iti maysa a lalaki a wanted person ken maibilang kas Top 1 Municipal Level iti Sitio Natdek, Brgy. 6 Tonoton iti ili ti Piddig.
Inbatad ni Police Lt. James Jacalne, ti chief of police iti ili ti Piddig a ti akusado ket agtawen ti 19, estudyante ken residente iti Brgy. 3 Loing iti nasao nga ili.
Segun ken ni Jacalne, ti akusado ket natiliw babaen ti bileg ti warrant of arrest nga inparuk-at ni Hon. Bonhoeffer Vergara Bernardez, ti assisting Judge iti Regional trial Court Branch 11 ditoy ciudad ti Laoag gapu iti kaso na a panaglabsing iti Republic Act (RA) 9995 wenno Anti-Photo and Video Voyeurism Act of 2009 ken ti Republic Act (RA) 9262 wenno Anti-Violence Against Women and Their Children Act.
Nairekomendar ti 114 ribo a pisos a piyansa ti akusado para iti temporaryo a pannakawaya-waya na.
Mainaig iti daytoy, natiliw met ti maysa a babai a pagayam ti akusado nga agtawen ti 23, addaan ti live-in partner ken residente iti Sitio Guisit, Brgy. 18 Estancia iti ili ti Piddig.
Daytoy ket babaen metlaeng iti warrant of arrest nga inparuk-at ni Hon. Bonhoeffer Vergara Bernardez, ti assisting Judge iti Regional trial Court Branch 11 ditoy ciudad ti Laoag gapu iti kaso a panaglabsing iti Republic Act (RA) 9995 wenno Anti-Photo and Video Voyeurism Act of 2009 no sadinno a nairekomendar ti 42 a ribo a pisos para iti tempraryo a pannakawaya-waya na.
Namonganay iti pannakaipila ti kaso kontra kadagiti dua nga akusado no sadinno a ti estudyante ket maipagarop nga in-video na ti nobya na ken inwaras met ti pagayam na a babai.
Iti agdama, nagtalinaed dagiti akusado iti kustodyar ti Philippine National Police (PNP) iti ili ti Piddig.
