LAOAG CITY – Nangiyebkas ti panagdanag ni Bicol Saro Partylist Representative Brian Raymund Yamsuan iti kumarkaro nga epekto ti ‘aging fisherfolks’ ditoy Pilipinas iti food security ti pagilian.
Inkiddaw ni Yamsuan nga aglukat ti gobierno ti ad-adu pay nga scholarship kadagiti agtutubo nga agad-adal tapno maallukoyda a mangala pakaseknan iti aquaculture ken panagkalap.
Inbatadna a nasken a paigetan pay ti gobierno ti panangipatungpal ti post-harvest ken marketing programs daytoy para iti sektor tapno makapastrek ti panagkalap ken dagiti adda ti pakainaiganna nga aktibidad para kadagiti agtutubo a Pilipino.
Ni Yamsuan ti baro a nadutukan a chairperson ti House Committee on Aquaculture and Fisheries.
Iti umuna a panagdengngeg nga indauloan ni Yamsuan kas chairperson ti Komite, inrakurak ti Bureau of Fisheries and Aquatic Resources a dumanon iti 2.5 a milyon a Pilipino ti mangnamnama kadagiti kabaybayan ti pagilian para iti pagbiaganda, sumurok-kumurang a 24% wenno 600 a ribu ket agtawen ti 60 idinto ti maysa pay ket 21% wenno sumurok-kumurang a 525,000 ket agtawen ti 51 agingga 60.
Kunana a kayatna a saoen ket agarup kagudua wenno 1.1 a milyon ket nataengan nga adda ti 8% wenno dumanon iti 200 a ribu dagiti ubbing a mangngalap nga agtawen ti 21 agingga agtawen 30 idinto a dagiti dadduma ket agtawen ti 31 agingga 40.
