LAOAG CITY – Insigida a dinismiss ti piskalya ti probinisya ti reklamo a naipila kontra kadagiti nagtakaw ti kalding idiay Banna, Ilocos Norte.
Daytoy ket kalpasan a nagpila ti Affidavit of Desistance kageddan iti panangkiddaw ti biktima a ni Juanito Tungpalan y Gandesa, agtawen ti 52, naasawaan ken residente iti Sitio, Tanap, Brgy. Macayepyep, Banna Ilocos Norte.
Segun iti PNP-Banna, maiyarig nga ingeddan ni Tungpalan ti panagpila na ti “affidavit of desistance” kontra kadagiti suspek bayat nga ipilpila da ti reklamo kontra kadagitoy babaen iti “in quest”.
Nabigbig dagiti suspek a da Rommel Garcia y Yere, agtawen 33, naasawaan, mannalon,residente ti Brgy Macayepyep, Banna ken Winnard Manarpaac y Bragas, agtawen ti 41, naasawaan, mannalon ken residente iti Brgy Pasil, Paoay.
Kuna ti pulisya a daytoy ti rason nga awan ti naaramidan ni OIC/Assistant Provincial Prosecutor Rommel G. Calupig no saan nga iti nang-dismiss ti reklamo ken inbilin na a mawayawayaan dagiti suspek a natiliw kalpasan a nabigbig a dagitoy ti nagtakaw.
Maipalagip a napasamak ti insidente idi December 15, 2018, iti paset ti Bongo River, bisinidad ti Sitio, Tanap, Brgy. Macayepyep, iti nasao met la nga ili.
