LAOAG CITY – Nakasentro laeng ti atension ni Alex Eala iti panagpapigsa tapno ad-adda nga agbalin a nakasagana kadagiti sumarsaruno a torneo a pakipasetanna.
Malaksid iti pisikal nga aspeto, pappapigsaen pay ni Alex ti mental health daytoy tapno saan a maapektaran ti performance-na kadagiti torneo, mangabak man wenno maabak.
Dakkel a tulong nga adda ti team daytoy tapno mabayabayan isuna iti tunggal garawna iti WTA Tour.
Saan nga angaw ti makibinnalubal iti maysa a world class tournament kas kadagiti pakiparpartisiparan ni Eala a makalablabanna dagiti top ranked players iti lubong.
Inadmitir ni Eala nga adu pay ti pagdalananna tapno magun-od ti balligi.
