LAOAG CITY – Maibilangen a maysa a centennarian ni Mrs Maria Maltezo, residente ti Brgy. 56 Bacsil iti ciudad ti Laoag.
Inistorya ni Maltezo dagiti rason a nakatulong kenkuana a makaabot iti tawen a 100 kas iti pannangan na iti nateng.
Segun kenni Maltezo, magustwan na ti uminom ti sanga-eskudilya a soft drinks kada malpas a mangan ken agtabako pay laeng.
Inpannakel na a kabaelan na pay a labaan ti arwaten na laksid iti tawen na a 100 ken makabasa pay laeng ti bannawag nga awan iti us-usaren nga antsokos.
Naamoan nga adda ti innem nga anak ken dua kadagitoy ti natay, dagiti met nabati ket adda da idiay San Fernando, La Union, dua ti adda iti ballasiw taaw ken ken maysa kadagitoy ket kabbalay na.
Addaan pay ti 21 a “great grandchildren” ken 20 a “great great grandchildren”.
Kabayattan na, kuna na nga usaren na ti 100,000 a pisos a naawat na manipud iti lokal a gobyerno a pagpatarimaan iti sumagmamano a parte ti balay na.
