LAOAG CITY – Maysa nga agtawen ti 17 a balasang manipud Nanchang, China ti napan iti ospital tapno agpakonsultar maipapan iti ut-ot ti lapayagna.
Segun iti saanen a nainaganan nga agtutubo, makalawasen a nasakit ti lapayagna ket saanen a kabaelan ti ut-ot daytoy.
Inbatadna a nakariing laeng daytoy nga adu ti sakit ti lapayagna. Naipadamag met nga adda ti narikna ti maseknan a nagkarayam iti uneg ti lapayagna.
Insigida a kinita ti doktor babaen ti microscope ti lapayag ti agtutubo ket uray dagiti doktor ket nasdaawda gapu ta adda nasarakan a sibibiag nga ipes iti lapayag ti agtutubo.
Insigida nga inaramid ti doktor ti panangikkat iti ipes. Agpukpukkaw ti pasiente kabayatan ti panangalana iti ipes agingga iti balligi ti pannakaikkat iti sibibiag nga ipes.
Inlawlawag ti doktor, nagkarayam ti ipes iti lapayag kabayatan a matmaturog ti agtutubo.
Mabalin nga agsapsapul ti ipes ti taraon ket simrek iti lapayag ti maseknan.
