LAOAG CITY – Inpakaammo ni Mrs. Divine Sevilla, ti mangidadaulo iti Speak Up I’m Here ti Gobierno Probinsial ti Ilocos Norte nga agtawen ti pito ti kaubingan ti makapaspasar ti mental health problem ditoy probinsia.
Segun kenkuana, daytoy ket binayabayan ti bukudna nga ina tapno iyasideg ken maikkan ti naan-anay a panangtarabay iti agdama a situasion iti daytoy.
Inbatadna nga umad-adu dagiti agturturong iti opisinada tapno agkiddaw ti tulong maipapan iti mental health awareness.
Inlawlawagna a ti kangrunaan a rason ti mapaspasaran a depresyon iti maysa nga indibidual ket ti problema ti relasion iti pamilia, gayyem ken ti estado iti panagbiag.
Mainaig iti daytoy, kunana nga umad-adu ti agap-aplikar iti Psychiatric Medicine Assistance no sadino mabalinda a maka-avail iti daytoy no na-diagnosed dagitoy iti mental heath disorder.
Kinunana nga adda ti pundo a nailatang para iti daytoy isu a gutgutigutenna dagiti maseknan nga umili nga agkasapulan iti naan-anay pannakaagas nga agturong laeng iti opisinada.
Innayonna a saan nga agpangadua nga agpakonsultar nangruna ket libre daytoy ken tapno masakbayan dagiti nasken a kasapulan nga aramiden para iti salun-at.
