LAOAG CITY – Kiniddaw ni Mayor Aldrin Garvida kadagiti umili iti ili ti Nueva Era nga agaramid ti alternatibo a wagas iti baet ti oil crisis a mapaspasaran iti pagilian.
Segun kenkuana, napintas no agbalin a praktikal dagiti umili iti kangitingitan ti krisis tapno makain-inot kas ti panagusar ti kayo a pagluto nga imbes nga agusar ti Liquefied Petroleum Gas.
Inbatadna a maysa pay a wagas tapno saan unay nga aggastos maipapan iti taraon ket mabalin nga agala kadagiti mula iti arubayan wenno aglawlaw iti pagtaengan.
Inlawlawagna nga adda ti ordinansa iti ili ti Nueva Era mainaig iti backyard gardening tapno adda ti pangalaan dagiti residente kadagiti mabalin nga iluto a taraon nga isu pay a nayon a gatangen dagitoy iti merkado publiko.
