LAOAG CITY – Pimmusay ti agtawen ti dua nga ubing kalpasan a nadungpar ti van it Barangay Manarang iti ili ti Vintar.
Segun kenni Police Capt. Manuel Ordonio, ti biktima ket agtawen ti dua ken residente iti Brgy. Santiago, Benito Soliven, Isabela idinto a ti driver ti van ket ni Wilson Garcia y Butac nga agtawen ti 45, naasawaan, uliteg ti biktima ken mannalon ken residente met laeng iti nadakamat a lugar idiay Isabela.
Inbatad na a basar iti imbestigasyon da ket inbaga ti ubing iti ina na a makaisbo daytoy rason a kinuyog met ti ina nga umisbo partikular iti sangwanan ti Nissan Caravan Van nga agmaris ti nangisit.
Nupay kasta, bayat nga umis-isbo ti ubing ket pimmanaw ti ina na gapo ta napan na innala ti bag na iti uneg ti pagtaengan ken iti dayta met a gundaway ket rimuar ti driver ken pinaandar na ti lugar gapo ta urnusen na ti pannakaparking daytoy.
Kunana a bayat nga iplasplastar ti driver ti pannakaparking ti lugan da ket naligayan ti ulo ti ubing a nangitunda ti dagus a pannakatay na.
Inlawlawag na nga idi nakita ti ina a nagandar ken naggaraw ti lugan ken dagus a nagtaray iti ayan ti anak na ngem naudin gapo ta naligayanen ti biktima no sadinno ket napitpit ti ulo na.
Naamoan a dagiti maseknan ket aggapo iti Isabela ken napan da nakiminatay iti pimmusay a kabagyan da iti ili ti Vintar.
Mainaig iti daytoy, saanen metten nga agpila ti reklamo ti ina ti biktima gapo ta patien na nga aksidente ti napasamak.
Nakasagana met ti driver a tumulong iti magastos para iti pannakaimansayag agingga a maitabon ti biktima.
Kabayatanna, manamnama met a maiyawid ti bangka ti ubing iti probinsya ti Isabela.
