LAOAG CITY – Maysa nga agtutubo iti Michigan, U.S.A. ti nakagun-od ti world record gapu iti kinadakkel ti ima ken sakana.
Kinumpirmaran ti records keeping organization a Guinness World Records a ti agtawen iti 16 a ni Eric Kilburn Jr. ti baro a record holder ti titulo a “Largest Feet on a Living Teenager” gapu iti sakana a 13.5 inches.
Ti shoe size ni Eric ket size 23, nakadakdakkel maidasig iti gagangay a shoe size nga 8.5 agingga 9.
Malaksid iti nasao a Guinness title, naawat met ni Eric ti titulo a “Largest Hands on a Teenager” gapu iti rukod ti imana a 9.13 inches.
Gapu ta saan a gagangay ti kinadakkel ti saka ni Eric, kasapulanna pay nga iparanta ti rukod ti sapatosna a nangina ti bayadna.
No dumteng met ti nalamiis a paniempo, masapolna met nga agpa-customize ti winter gloves.
Kalpasan a ma-feature iti TV ken dagiti news program ni Eric, immasideg kenkuana ti maysa kadagiti sportswear brand a Puma ken Under Armour ken nangidiayada nga isponsoran isuna kadagiti sapatos.
