LAOAG CITY – Inlawlawag ti maysa nga Health Practitioner a ni Dr. Alan Taylan, Internal Medicine ti St. Camillus De Lellis Hospital ditoy siudad ti Laoag ti sakit a nangitunda iti pannakatay ti 2025 Palarong Pambansa gold medalist a ni Mark Dave Nicolas nga agtawen ti 18 ken residente iti Barangay Boyboy iti ili ti Piddig.
Segun kenkuana, daytoy ket maysa a kondision kadagiti pasiente nga adda ti mapasamak kadakuada a makaptan ti mikrobio, bacteria, virus wenno fungus a no saan a malabanan ti bagi ti maysa a tao ket isu ti maaw-awagan ti septic shock.
Inbatadna nga adda ti nagduduma nga stage daytoy kas ti SIRS wenno Systemic Inflammatory Response Syndrome no sadinno a ti maysa a pasiente ket aggurgurigor ti sumurok 38 degrees agpangato wenno nababbaba ngem iti 36 degrees.
Inlawlawagna a mabalin a ti pulso wenno heart rate ti pasiente ket sumurok 90 wenno ti panagangesna ket sumurok 20.
Kunana a tumaud ti septic shock babaen kadagiti impeksion ti bagi ti maysa nga indibidual a posible nga agwaras a mangitunda ti nakarkaro a panagsakit.
Innayonna a nasaysayaat a masigud a maagasan ti kastoy a klase ti sakit tapno saanen a kumaro pay ken saan nga agtungpal iti pannakairisgo ti biag.
Maipalagip a naitaray iti Mariano Marcos Memorial Hospital and Medical Center iti siudad ti Batac ni Mark Dave kalpasan a nakarikna ti panagut-ot ti sakit iti akin-kannawan a luppona.
Immuna iti daytoy, basar iti diagnosis ti Mariano Marcos Memorial Hospital and Medical Center, natay ni Mark Dave gapu iti septic shock secondary to soft tissue infection (R) leg; compartment syndrome.
