LAOAG CITY – Agladladingit ti Laoag City Athletic Association gymnastics team kalpasan ti pannakatay ti Region 1 Athletic Association gold medalist a ni Carl Niño Acosta a residente iti Barangay 45 Tangid ditoy siudad ti Laoag.
Segun ken ni Mr. Jerry Carreon, School Principal IV ti Ilocos Norte National High School, basar iti inpakaammo dagiti coach ken trainer ti atleta manipud iti nasao a pagadalan, na-out of balance ni Carl Niño iti panagpuligosna iti ngato rason a saanna a nabalanse ti panagdissona iti gymnastics springboard.
Inladawan ni Carreon ni Carl Niño a nalaing ken nasingpet nga estudiante isut gapuna a dakkel a pukaw iti pagadalanda nangruna ket naruay a pammadayaw dagiti magungun-odna iti lubong ti ay-ayam.
Inlawlawagna a gapu iti napasamak ket maipatungpal ti ad-adda a panagan-annad kadagiti amin a maiwaywayat a panagsanay dagiti umaayam tapno maliklikan ti kapada nga aksidente.
Maipalagip a nakagun-od ni Carl Niño ti tallo a gold medals ken dua a bronze medals iti Region 1 Athletic Association.
Immuna iti daytoy, manarimaan ti panagsagsagana ti nasao nga student-athlete para iti mapaspasangasangan a 2026 Palarong Pambansa nga irepresentarna ti intero a rehion uno.
