LAOAG CITY – Agladladingit ti University Athletic Association of the Philippines kalpasan ti pannakatay ti 2025 Palarong Pambansa gold medalist a ni Mark Dave Nicolas nga agtawen ti 18 ken residente iti Barangay Boyboy iti ili ti Piddig.
Segun ken ni Mrs. Mariel Nicolas, ina ti pimmusay nga atleta a Grade 12 student iti Adamson University, naitaray iti Mariano Marcos Memorial Hospital and Medical Center iti siudad ti Batac ti anakna kalpasan a nakarikna ti panagut-ot ti sakit iti akin-kannawan a luppona.
Inbatadna a nagpakpakaasi ti anakna a naka-wheel chair kadagiti nurse nga insigida a dumalan daytoy iti operasion gapu iti nakaro a sakit a marikriknana.
Nupay kasta, kuna ni Nicolas a ti insungbat kadakuada dagiti nurse ket adda pay laeng ti manarimaan a dumaldalan iti operasion kadayta a gundaway.
Inlawlawagna a naka-schedule ti alas otso ti rabii iti pannakaipadalan ti operasion ti anakna ngem alas dos ti parbangonen idi naopera daytoy.
Kunana a pinagpirma isuna ti doktor sakbay a naopera ti anakna gapu ta narisgo ti operasion.
Inpettengna a gapu ta saan a maigaraw ti saka ti anakna ket naipadalan manen daytoy iti maikadua nga operasion no sadinno a pinagpirma manen isuna ti doktor.
Inpaganetgetna nga awan ti maaramidanna no diket agpirma lattan gapu ta kalikagumna nga agimbag ti anakna.
Mainaig iti daytoy, inpasingked dagiti kaklase ni Mark Dave manipud iti Adamson University nga agtalinaedda ti tallo nga aldaw kabayatan ti pannakaimasanyag ti bangkay daytoy.
Basar iti diagnosis ti Mariano Marcos Memorial Hospital and Medical Center, natay ni Mark Dave gapu iti septic shock secondary to soft tissue infection (R) leg; compartment syndrome.
Naammoan a maikalima ni Mark Dave kadagiti pito nga agkakabsat ken naanus a tumultulong iti pamiliana babaen ti pannakibinnalubalna kadagiti nagduduma nga sports competition.
Kabayatanna, inpasingked ti ina ti pimmusay nga atleta a subliananna ti ospital a nangtaming iti anakna apaman a maitabon no sadinno a nakasagana a tumulong ti opisina ni Ilocos Norte 1st District Representative ken Presidential Son Sandro Marcos.
Immuna iti daytoy, sumagmamano nga aldaw sakbay a naitaray iti ospital ni Mark Dave ket napan pay nakilaban iti track and field iti ili ti Pasuquin no sadinno nga isuna ti nagkampeon.
Maipalagip a nakaaramid ti pakasaritaan ni Mark Dave kalpasan a nakagun-od ti baro a national record iti 800-meter run para iti secondary boys idi 2025 Palarong Pambansa.
