LAOAG CITY – Kalikagom ni Mrs. Mariel Nicolas, ina ti pimmusay a 2025 Palarong Pambansa gold medalist a ni Mark Dave Nicolas a mapilaan ti kaso ti Mariano Marcos Memorial Hospital and Medical Center (MMMH&MC) no mapaneknekan nga adda nagkuranganda iti pannakataming ti anakna.
Inbatadna a manarimman iti pannakitaripnongna kadagiti abogado iti babaen ti tulong ni Governor Cecilia Araneta Marcos ken ni Vice Governor Matthew Marcos Manotoc no sadinno nga inadmitirda nga adda nagkurangan ti nasao nga ospital.
Kunana pay nga awan man laeng iti mensahe ti ospital tapno dumawat iti despensar wenno makipagladingit.
Nupay kasta, agtultuloy ti tulong a maawawatda iti babaen ti Governor ken Vice Governor iti probinsia pakairamanen ti pannakailippas ti arapaap a pannakapapintas ken pannakaituoy iti pagtaenganda Mark Dave ken iti sigurdo nga scholarship dagiti kakabsatna bayat nga agadal danto iti kolehiyo.
Innayonna nga uray no awanen ti anakna ket agtultuloy latta ti suporta dagiti umili ken ni Mark Dave no sadinno a nangiyuswatda pay ti Run for a Cause iti babaen dagiti kaduana nga atleta ken kasta payen ti Fun Run a naiwayat iti ballasiw-taaw.
Kabayatanna, napalaos ti panagyaman ni Mrs. Nicolas iti Provincial Government of Ilocos Norte (PGIN), dagiti coaches ni Mark Dave, Mayor Georgina Guillen, ken dagiti amin a mangsupsuporta ken ni Mark Dave gapu ta agtultuloy latta daytoy no sadinno a kanayonda a damagen ni Mrs. Nicolas iti kasasaadna mainaig iti naladingit nga ipupusay ti anakna.
