LAOAG CITY – Inlawlawag ti maysa nga Health Practitioner a ni Dr. Alan Taylan, Internal Medicine ti St. Camillus De Lellis Hospital ti maipanggep iti Ischemic heart disease.
Segun kenkuana, daytoy ket maysa a kondision ti bagi ti tao a saan a napintas ti panagtaray ti puso.
Inbatadna a no makapasar ti maysa nga indibidual ti bassit a panagtaray ti dara iti coronary arteries ket makarikna daytoy ti panagsakit ti barukong, takiag ken buksit.
Inlawlawagna a posible a makapasar ti narigat a panaganges ti makarikrikna ti ischemic heart disease no saanna a kabaelan ti marikriknana a sakit.
Inpettengna a ngumatngato ti bilang ti datos nga umub-ubing dagiti agbalbalin a pasiente iti nasao a sakit nga agtawen ti 20 agingga 30.
Maipalagip a nagtalinaed a kangrunaan a rason iti pannakatay ditoy Pilipinas idi 2025 ti ischemic heart diseases basar iti inparuk-at a provisional report ti Philippine Statistics Authority (PSA).
Basar iti report ti Philippine Statistics Authority nga inparuk-at ita a lawas, umabot iti 111,896 ti nairekord a kaso dagiti matmatay gapu iti ischemic heart diseases manipud Enero agingga Nobiembre 2025 a katukad ti 19.7% ti pakabuklan a bilang dagiti matmatay iti pagilian.
