LAOAG CITY – Saan pay a nakaawat ti tulong ti sumagmamano a mangngalap iti Barangay Davila iti ili ti Pasuquin a naapektaran iti Balikatan Exercises.
Segun ken ni Ret. SPO4 July Tadeo, Presidente dagiti mangngalap iti nasao a barangay, adda ti panangipaay ti tulong pinansial ni Department of National Defense Sec. Gilberto Teodoro Jr. kadagiti maseknan a mangngalap ti sag-lima ribu a pisos iti tunggal maysa.
Nupay kasta, inpettengna nga awan pay ti naawatda a tulong manipud iti gobierno.
Inlawlawagna a dakkel ti epektona ti pannakaipawil kadakuada ti saan a panagkalap nangruna ket daytoy ti kangrunaan a pagbiaganda.
Kunana a 70 a porsiento iti produksion ti ikan ket aggapu iti barangayda.
Kiniddawna ken ni Gov. Cecilia Araneta Marcos nga ipalubosdan ti panagsubli iti panagkalap dagiti mangngalap no awan met laeng ti tulong a maipaay kadakuada.
Innayonna nga umabot iti agarup 500 a mangngalap ti apektado iti manarimaan a maiwaywayat a Balikatan Exercises ditoy probinsia.
