LAOAG CITY – Awan ti kinapudno na ti agwarwaras a report nga addan ti kaso a coronavirus ditoy probinsya ken naiconfine iti Mariano Marcos Memorial Hospital and Medical Center (MMMHMC) iti ciudad ti Batac.
Daytoy ti inbatad ni Doctora Marie Joyce Urnos Santos, Infectious Disease Specialist ti nasao nga ospital kabayatan ti programa a Doctor Bombo ditoy Bombo Radyo Laoag.
Kagiddan iti daytoy, immapela ni Doctor Santos iti publiko a saan nga agiwaras ti saan a kumpirmado a damag a mabalin a pakaalarmaan ti kaadoan.
Inbalakad na met kadagiti umili ditoy probinsya nga iti baet ti ngumatngato a kaso ti nasao a sakit ket agtalinaed koma a kalmado, agridam ken agkararag iti Diyos.
Malaksid iti daytoy, pagtalinaeden a nadalos ti bagi, proper hygiene, uminom ti ado a danom, agipauneg kadagiti nasustansiya a tarain wenno ti makunkuna nga healthy lifestyle.
Kabayatanna, inpasingked ni Santos a 100 a porsiento a nakasagana ti Mariano Marcos Memorial Hospital and Medical Center para iti coronavirus.
Nupay kasta, mangnamnama nga awan ti agbalin a kaso ti nasao a sakit ditoy probinsya.
