LAOAG CITY – Inpetteng ni House Senior Deputy Minority Leader ken Mamamayang Liberal Partylist Rep. Leila de Lima a mabalin a kasoan ni Senador Robin Padilla ti Obstruction of Justice.
Inrakurak daytoy ni De Lima mainaig iti maipagarup a panangtulong ni Padilla a makalibas ni Senador Ronald Bato Dela Rosa a sumangsango ti warrant of arrest gapu iti kaso a crimes against humanity iti International Criminal Court.
Inpaganetgetna a kas dati a sekretario ti Department of Justice (DOJ) a nalawag nga Obstruction of Justice ti panangtulong ken panangilemmeng iti maysa a kriminal a pugante.
Kunana nga iti napasamak a panaglibas ni Dela Rosa ket dagiti tattao, linteg ken rule of law ti naabak.
Naglikudan ni De Lima ti inrakurak ni Senate President Cayetano a naglemmeng met isuna iti Senado idi 2017 iti babaen ti Duterte Administration idi ipaarestar gapu iti kaso nga adda ti pakainaiganna iti ilegal a droga.
Inpalagip ni De Lima a nakappia daytoy a simmuko ken nagpaarestar idi Pebrero 24, 2017.
Kuna pay ni De Lima, sakbay daytoy ket sumagmamano nga oras laeng daytoy a nagawid idi tapno agpakada iti pamiliana ken nangala kadagiti kagamitan idinto a maysa a nagpatnag a nagtalinaed isuna iti Senado tapno kasarita dagiti staff-na.
