LAOAG CITY – Sinungbatan ti Department of Justice (DOJ) ti rakurak ni Senator Robin Padilla nga adadda a kayatna a maipan iti International Criminal Court (ICC) ti reklamo nga Obstruction of Justice.
Daytoy ket kagiddan ti pannakaipatulod ti subpoena ti Department of Justice (DOJ) ken ni Padilla ken dadduma pay nga indibidual mainaig iti panaglibas ni Senator Bato dela Rosa manipud iti Senado idi Mayo.
Segun ken ni Department of Justice (DOJ) Undersecretary Ian Norman Dato a responsibilidad ti ahensia nga ipaayan ti naananay a tignay ti reklamo a naipila kenkuada.
Kunana a mabalin a maibilang daytoy nga agsina a reklamo gapu ta ti Philippine National Police-Criminal Investigation and Detection Group (PNP–CIDG) ti nangipila ti reklamo kontra ken ni Padilla iti Department of Justice (DOJ).
Inlawlawag met ti Department of Justice (DOJ) no apay saan a karaman da Senator Alan Peter Cayetano ken dati nga Senate Sergeant-at-Arms Mao Aplasca kadagiti naireklamo.
Kabayatanna, kuna pay ni Dato nga iti agdama ket awan pay ti naikiddaw kadakuada nga ipan iti Immigration Lookout Bulletin Order (ILBO) ni Padilla.
