LAOAG CITY – Nagikkaten kas miembro ti House of Representatives ni Ako Bicol Rep. Zaldy Co.
Iti surat nga inpatulod na kenni House Speaker Faustino Dy III, nadagsen para kenkuana ti panagikkat na iti pwesto ken saan nga alisto ti nagbalin a desisyon na.
Nupay kasta, kunana a tiningiting na a nasayaat para met laeng iti pagsayaatan ti pamilya na ken kadagiti tattao a nagserbian na.
Ni Co ket maak-akusaran a nakaawat ti kickback manipud iti anomalya a flood control projects.
Itay laeng met ummuna a gundaway ket inrekomendar ti Independent Commission for Infrastructure ti pannakaipila ti kaso kontra kenni Co ken dagiti dadduma nga opisyal ti Department of Public Works and Highways (DPWH) gapo iti maipagarop nga iregularidad a P290-M flood control projects idiay Naujan, Oriental Mindoro.
Maipalagip a dinakamat ni DPWH Secretary Vince Dizon ni Co ken ti Sunwest Inc. nga ada iti likodan ti pito substandard flood control projects idiay Oriental Mindoro.
