LAOAG CITY – Sinungbatan ti beterana nga aktres a ni Vilma Santos ti makaigapu ti panagpaidasig dagiti dua nga annakna para iti mapaspasangasangan a 2025 Midterm Elections.
Daytoy ket kalpasan ti panangipila ti certificate of candidacy dagiti annakna a da Luis Manzano ken Ryan Christian Recto.
Nangipila iti kina-Gobernador idiay Batangas ti aktres idinto a Bise Gobernador met ti anakna a ni Luis ken kongresista iti maikanem a distrito ti Batangas ti anakna a ni Ryan iti babaen ti Nacionalista Party.
Segun iti aktres a saan laeng nga isuda ti agar-aramid ti panagpaidasig nga agkakapamilia gapu ta adu a pulitiko ditoy pagilian ti kageddan ti kapamiliana ti nagpaidasig.
Inlawlawagna nga adda ti serbisio nga ididiayada kadagiti umili a dagitoy mismo ti agpili kadakuada.
Kunana a gagem dagiti umili nga agpailayon isuna iti kina-Gobernador gapu ta ti asawana a ni Ralph Recto ket sekretario ti Department of Finance.
Inbatadna a napilina nga agpaidasig dagiti annakna ket gapu ta na-expose dagitoyen iti panangipaay ti serbisio.
Mamati ti nabirngasan nga “Star For All Season” a makaipaay ti napintas a serbisio dagiti annakna iti publiko gapu ta napadasan ken nakitana ti pudno a kasasaad dagiti umili idiay Batangas.
