LAOAG CITY – Ibilang ti aktor a ni Alden Richards nga ad-adda pay nga immuneg ti relasyon da iti co-star na iti “Hello, Love, Again” a ni Kathryn Bernardo.
Kuna na nga iti pannakaam-ammo na a naimbag ken ni Kathryn ket ado dagiti nadiskubre na a pagpadaan ken pagdumaan da seknan iti panagbiag.
Saan a sinungbatan ti aktor no agrayrayon iti aktres ngem inadmitir na a tunggal adda ti panawen na ket mapan bumisbisita iti balay da Kathryn, kagiddan ti panagyaman na iti napintas a panangawat da kenkuana.
Nagyaman met ni Alden gapu ta naikkan ti gundaway a naam-ammo na ti pamilya ti balasang.
Inladawan ti aktor a napakumbaba ti pamilya ni Kathryn ken agpada da iti balasang a dimakkel iti probinsya.
Mainaig iti daytoy, inbatad ni Alden a no aniaman ti pagdaldalanan da ken ni Kathryn iti agdama ket masapol a tuturen na ken saanna a kayat nga agbalin a lapped kadagiti kayat nga aramiden iti biag kangrunaan na iti karera ti balasang.
