LAOAG CITY – Nakaaramid ti pakasaritaan ti Pinay tennis star a ni Alex Eala kalpasan a nagun-odna ti kaunaan a Women’s Tennis Association title-na idi abakenna ni Panna Udvardy ti Hungary, 1-6, 7-5, 6-3, iti finals ti Guadalajara 125 Open.
Iti tawenna a 20, inpakita ni Eala ti kinatibkerna kalpasan a napaay iti umuna a set sakbay a simmubbot ken naan-anay a maala ti kampeonato.
Naammoan a sakbay ti naisangsangayan a balligi, dandani a nagun-odna ti kampeonato iti Eastbourne Open (WTA250) idiay Great Britain idi Hunio ngem nabaak daytoy iti finals kontra ken ni Maya Joint.
Kabayatanna, ti panagballigi iti Guadalajara ket nayon iti dumakdakkel a koleksion dagiti titulona pakairamanan ti lima a singles titles iti International Tennis Federation.
