LAOAG CITY – Balligi a nakastrek iti semifinals ti WTA 500 Berlin Tennis Open ni Alex Eala kalpasan ti panangabakna kontra iti world No. 8 a ni Elina Svitolina ti Ukraine, 6-3, 6-4.
Daytoy ti maikatlo a gundaway a nakastrek ni Eala iti semifinals iti maysa a WTA tournament iti agdama a tawen ken maikainem a panangabakna daytoy kontra iti maysa a top-10 player iti sibubukel a career-na.
Ni Eala ket alisto a nakaadayo iti umuna a set ket inlippasna ti score a 6-3 ken inserrana ti maikadua a set iti 6-4 iti uneg ti maysa nga oras ken 23 a minuto.
Mainaig iti daytoy, makabinnalubal ni Eala iti semifinals ti world No. 13 a ni Linda Nosková ti Czech Republic a nangabak ken ni Paula Badosa.
Maipalagip a nagkampeon ni Eala iti naudi a Birmingham WTA 125 a rason ti pannakatugawna kas No.35 iti world ranking.
Kabayatanna, manarimaan nga iggem ni Eala ti 9-1 record iti grass courts iti agdama a season a mangmangted kenkuana ti kumpiansa sakbay ti Wimbledon inton Hunio 29.
