LAOAG CITY – Balligi a rinugian ni Alex Eala ti panagay-ayamna iti Madrid Open kalpasan nga inabakna ti Bulgarian a ni Viktoriya Tomova iti Round of 128 a naisayangkat idiay Spain.
Iti iskor a 6-3, 6-2, pinaneknekan ti agtawen ti 19 a ni Eala, agdama a world no. 72 a nakasagana isuna a makigiddan iti nangatngato a ranggo kas ken ni Tomova a nangatngato ti walo a puesto kenkuana iti world rankings.
Gapu iti daytoy a panagballigi, ngumato ni Eala iti Round of 64 no sadinno a maminsan manen a makalabanna ti world no. 2 a ni Iga Swiatek.
Nagsangon ti dua iti Miami Open idi Marso no sadinno a nakigtot ti tennis world kalpasan a nakagun-od ni Eala ti upset kontra iti Polish star iti quarterfinals, maysa a balligi a nanglukat ti nalawlawa nga atension iti karerana.
