LAOAG CITY – Sinentensyaan ti Pasig Regional Trial Court Branch 167 a guilty ni dati a Bamban, Tarlac Mayor Alice Guo gapo iti kaso a Qualified Trafficking in Persons.
Gapo iti daytoy ket pinatawan ti korte ti reclusion perpetua wenno tungpal biag a pannakaibalod ni Guo.
Ti sentensya ket adda ti pakainaigan na iti operasyon ti Philippine Offshore Gaming Operators (POGO) idiay Bamban no sadinno ket ginasot a mangmangged ti naisalakan iti raid.
Ni Guo ket nagbalin a sentro ti kontrobersya kalpasan a rimuar dagiti alegasyon a konektado iti Chinese nationals ken iti iligal a POGO hub.
Malaksid iti trafficking, nagbalin pay nga isyu ti kinatao ken citizenship na a nakaala ti interes ti publiko.
Naamoan a ti desisyon ti korte ket maibilang a maysa a pakasaritaan iti maysa a lokal nga opisyal a nairaman iti POGO-related crimes.
Maibilang pay daytoy a balligi para kadagiti biktima ti human trafficking ken ballaag kadagiti opisyal a mabalin a maraman iti iligal nga operasyon.
