LAOAG CITY – Agtultuloy ti pangiyuswat iti City Health Office babaen iti lokal a gobierno iti Alisto Health and Medical Caravan para kadagiti umili ditoy ciudad ti Laoag.
Segun kenni Dr. Rodrigo Catcatan, mangidadaulo ti City Health Office a napateg ti salun-at, a rason nga isu da pay a mismo ti umasideg kadagiti amin a barangay tapno maipadanaon iti serbisio medikal.
Kunana nga itay kallabes ket nagturong iti Barangay San Mateo, Rioeng, Camangaan ken kabangibang pay a barbarangay ti Alisto Medical and Health Caravan a naiwayat iti Barangay San Mateo.
Inbatadna a ti naipaay ket ti libre a medical check-up, dental ken agas ti naisagot kadagiti umili babaen ti gobierno siudad a panangiwanwan ti City Health Office.
Kunana a no nasalun-at ti komunidad, al-alisto ti panag-asenso ken panagprogreso.
Inayonna a ti Caravan ti agsursursor iti nagduduma a barangay iti siudad para ti panangipasingked ti naan-anay a serbisio.
