LAOAG CITY – Nagkiddaw manen ti pammakawan ni Bernie Lazo alyas Bayaw kangrunaan na ti pamilya ni dati a Mayor Arsenio Agustin idiay Marcos, Ilocos Norte.
Inbatad na a nasingpet a tao ti sigud a mayor ngem nasilaw laeng ti kwarta a naidiaya kenkuana kasukat ti panangpatay da ti sigud a mayor.
Inbatad na a no mabalin na nga ibabawi ti napasamak ket aramiden na daytoy.
Nupay kasta, kuna na nga awanen ti maaramidan na gapu ta uray ania pay ti ar-aramiden na ket saan nan a maibabawi ti napasamak.
Innayon ni Lazo a mariribukan met daytoy isut gapu na nga inkeddeng na nga ibutaktak laengen ti pudno nga adda ti likudan ti napasamak ken ni Agustin.
Segun kenkuana, babaen ti inaramid na ket matulungan na ti PNP kangrunaan na dagiti agladladingit a pinanawan ni Agustin.
Maipalagip nga intudo ni Lazo ni Mayor Jessie Ermitanio ti ili a Marcos a mastermind ti pannakatay ti sigud a mayor.
Kabayatanna, iti panagsango met da Valenzuela ken Ermitanio ket nagtalinaed ti takder ti naud-udi nga awan ti ammo na ti alegasyon kenkuana ni Lazo.
