LAOAG CITY – Natay ti maysa a lalaki kalpasan a pinaltugan ti bukod na nga ama iti Barangay Capasan, Dingras, Ilocos Norte.
Nabigbig ti biktima a ni Alden Ver, agtawen ti 32, addaan ti live-in partner idinto a ti ama a suspek ket ni Alex Ver, agtawen ti 59, agpada dagitoy a residente ti nasao a lugar.
Iti inisyal nga imbestigasyon ti PNP, naggiinom dagiti agama kadwa da ti tallo a sabsabali pay.
Inbatad ni Police Chief Inspector Christoper Malanom, deputy chief of police iti ili a Dingras, segun ti live-in partner ti biktima a ni Marina Espejo, kalpasan a naginom dagiti maseknan ket nakangngeg ti putok ti paltog.
Kuna pay ni Malanom a nakita ni Espejo ti katugangan na a suspek a nakaiggem ti paltog isut gapu na a saan nga immasideg a dagus.
Boluntaryo a simmuko kadagiti otoridad ti suspek bitbit na ti inusar na a paltog babaen ti panangbayabay kenkuana ni Barangay Kagawad Arthur Romero.
Naitaray ti biktima iti Dingras District Hospital ngem naideklara a dead on arrival.
Agtultuloy ti imbestigasyon dagiti otoridad seknan ti napasamak a pammaltog.
