LAOAG CITY – Nangipila ni Senador Robinhood “Robin” Padilla ti resolusion nga agkiddaw ti pannakaimbestigar ti Senado iti maipagarup a nagbalin a pagbasuraan ti paset ti ancestral domain dagiti Aeta iti Sitio Tibag, Subic, Zambales.
Iti Senate Resolution 513, kiddaw ni Padilla, ti chairperson ti Senate Committee on Cultural Communities and Muslim Affairs, nga imbestigaran ni sisinno ti responsable iti maipagarup nga operasion ti landfill, rehabilitasion ti lugar ken pannakapapigsa dagiti linteg a mangprotehir iti Indigenous Peoples ken dagiti ancestral-da.
Ti resolusion ket gapu iti maysa a television documentary a naipabuya idi Hulio 13 no sadinno a nairakurak nga us-usaren kas dumpsite ti paset ti ancestral domain manipud idi 2019.
Maipagarup a pakairamanan dagiti naibasura iti lugar ket kas kuma ti face mask, personal protective equipment ken dadduma pay a nausar idi Covid-19 pandemic.
Inbatad pay dagiti residente a kontaminado ti kangrunaan a pagal-alanda ti danum nga mangted iti problema iti salun-atda.
Dinakamat met ni Padilla iti maysa nga imbestigasion ti Department of Environment and Natural Resources idi 2022, a nangibilin iti munisipalidad ti Subic nga isardeng ti operasion ti dumpsite agingga 2025.
Segun iti senador, agserbi ti 1987 Constitution ken Republic Act 8371 wenno Indigenous Peoples’ Rights Act, iti proteksion kadagiti katutubo ken ancestral lands-da.
Impaganetgetna pay a maipawil ti Republic Act 9003 wenno Ecological Solid Waste Management Act of 2000, ti operasion ti open dumpsites.
