LAOAG CITY – Malaksid iti panagbalin nga aktor, singer ken recording artist payen ni Andres Muhlach.
Nangrugi idi Marso 21, 2025, mangngegan ti nagduduma nga audio streaming platforms ti cover version daytoy nga “Ikaw ang Miss Universe ng Buhay Ko,” ti 1974 hit song a pinasikat ti Hotdog band.
Sigurado a makigtot dagiti fans ni Andres apaman a mangngegda ti “soothing singing voice” ti aktor gapu ta nalaing daytoy iti panagkanta kas ti kasinginna a ni Atasha Muhlach.
Nasingpet, managpakumbaba ken managbabain ti impresion ti publiko ken ni Andres isu nga awan ti mangipagarup a nalaing met isuna nga agkanta.
Kabayatanna, adda iti umiso a panawen ti pannakairuar ti single ni Andres gapu iti nabara a panangarakup ti publiko iti Ang Mutya ng Section E, ti hit youth-oriented series ti Viva One a pinagbidaanda ken ni Ashtine Olviga ken Rabin Angeles.
