LAOAG CITY – Immapela ni Senate Minority Leader Koko Pimentel nga ikarigatan a lapdan dagiti angaw maipanggep iti panagpangta iti biag nangruna no daytoy ket inaramid iti maysa a public forum.
Daytoy a reaksion ni Pimentel ket kageddan ti “kill joke” ni dati a Presidente Rodrigo Duterte iti 15 a Senador tapno makastrek iti Senado dagiti pambato ti partidoda.
Inbatadna nga uray saan daytoy a nagbuteng iti inaramid nga angaw ti dati a Presidente ket narisgo latta dagiti nasao a rakurak.
Inlawlawag lider ti oposision iti Senado, adda latta ti followers ni Duterte ken saan a sigurado no kasanoda nga awaten dagiti nasao a klase ti angaw gapu ta posible daytoy a seryosoenda.
Kabayatanna, inpaima ni Pimentel iti Department of Justice ken National Bureau of Investigation no adda ti kaso a nasken a sangoen ni Duterte gapu kadagiti nagbalin a rakurakna.
