LAOAG CITY – Manamnama a ngumato iti 5.6 milyon a metriko tonelada ti angkaten a bagas ti pagilian intono 2027 gapu iti umad-adu a panagkasapulan ken populasion.
Daytoy ti inbatad ti United States Department of Agriculture (USDA).
Iti kaudian a World Markets and Trade report, kuna ti United States Department of Agriculture a mapatta-patta nga umabot iti 5.5 million a metriko tonelada ti importasion ti Pilipinas iti bagas ita a tawen ken manayunan ti 100 a ribo a metriko tonelada intono tawen 2027 gapu iti umad-adu a populasion ti pagilian ken agtultuloy a kinapateg ti bagas kas kangrunaan a taraon.
Maipalagip a nag-import ti pagilian iti 3.37 million metriko tonelada a bagas idi 2025 no sadinno a basar iti datos ket nakaangkaten ti Pilipinas iti 1.6 million metriko tonelada a bagas agingga idi Abril ita a tawen.
