LAOAG CITY – Inpetteng ni Atty. Neri Colmenares, maysa a human rights lawyer a mabalin a maabuso ti Anti-terror bill a naipasan iti maikatlo ken maudi a pannakabasa na iti Kamara.
Segun kenni Colmenares, maysa a wagas daytoy tapno maipatiliw dagiti kritiko ti administrasyon wenno kalaban iti pulitika.
Malaksid kadagiti kritiko, kuna ni Colmenares a narisgo pay ti nasao a gakat kadagiti kameng ti media nangruna no adda ti nangato a personalidad a sentro iti isyu.
Daytoy ket gapo ta uray awan ti basol ti maysa nga indibidwal no pinagatapan dagiti otoridad ket mabalin a mabalod iti sumagmamano nga aldaw nupay awan ti maiparuk-at a warrant of arrest.
Mainaig iti daytoy, kwinestyunaran pay ni Colmenares no apay a maikkat iti gakat ti pakaseknan iti seguridad dagiti tattao.
Inbatad pay ni Colmenares a no maipasa daytoy ket saan a mabalin a masuspenso ti linteg iti panawen ti eleksyon ket ditoy a rumwar ti mabalin a pannakatiliw dagiti kalaban iti panagpipili.
Kabayatanna, kuna pay ni Colmenares a saan a kasapulan ti Anti-terror law para iti terorista ken patyen na a para daytoy kadagiti agprotprotesta nangruna ti warrantless arrest.
Pinagbalin na nga ehemplo iti daytoy ket ti pannakatiliw ti maysa a tao ken no mapaneknekan nga inosente ket mabalin na nga ireklamo ti nangtiliw kenkuana.
Nupay kasta, iti babaen ti gakat ket agbalin laengen a regular filing ti proseso no awan ti basol ti maseknan nga indibidwal wenno ti makunkuna nga unlawful arrest.
Para kenni Colmenares, no dadduma ket mapilitan ti gobyerno nga aramiden ti saan na a kayat depende iti panangkontra dagiti tattao.
Inbatad na mabalin nga adda pay tsansa a saan a maipasa ti nasao a gakat no makita nga ado dagiti agreklamo seknan iti daytoy nupay sinertipikaran ni Presidente Rodrigo Duterte kas urgent.
Kunana a saan nga importante no dagiti tatto nga agreklamo seknan iti daytoy ket pro wenno anti-administration gapo ta apektado ditoy dagiti kaadoan nga indibidwal.
Inlawlawag na a ti gakat a manamnama a maipasa ket nayun laeng a bileg kadagiti otoridad wenno iti gobierno nga isu ti pagam-amkan na kas maysa a human rights lawyer.
Innayon na nga alisto laeng nga irakurak ti gobyerno a saan makaperdi ti anti terror bill iti panagbiag dagiti tattao.
