LAOAG CITY – Ad-adalen ti Sangguniang Panlungsod iti siudad ti Batac ti aplikasyon ti franchise ordinance ti galyera iti nasao a siudad.
Segun ti Chairman ti Committee on Games and Amusement a ni Sangguniang Panlungsod Member Lucky Bunye, adda dagiti requirements a dawdawaten da iti nagipasa iti aplikasyon a ni Julius Castro Nalupta, ti franchisee iti nasao a galyera.
Inbatad na a karaman kadagiti nasao a requirements ket ti kaadda ti betting machine, masapol a Filipino citizen ti mangimanehir ti galyera ken nasayaat ti rekord na iti Bureau of Internal Revenue.
Kuna ni Bunye nga immuna a nadakamat ni Nalupta nga adda ti gundaway a saan da a nakapagbayad iti buwis gapu iti pandemiya ken daytoy ti maysa a kitaen da sakbay a maipalubos ti prangkisa ti galyera.
Mainaig iti daytoy, inbatad ni Bunye a naipakaammon ti aplikasoyn iti committee on ways and means ken isu ti katulungan da a mangadal iti daytoy.
Kabayatanna, inpasigurado ti konsehal a dagus a maaprubaran ti aplikasyon ti franchise ordinance ti galyera laketdi masurot ken maited amin a kasapulan a requirements.
Naamoan nga Abril idi napan a tawen a naipila ti aplikasyon ti franchise ordinance ni Nalupta ngem nakadanon laeng iti Sangguniang Panlungsod idi Disyembre.
