LAOAG CITY – Kinumpirmaran ni Barangay Chairman Elmer Lorenzo iti Brgy. Zamboanga ditoy siudad ti Laoag a saan a naipakaammo kenkuana iti isasangpet ti maysa nga Authorized Person Outside Residence iti barangay da.
Daytoy nga APOR ket nagpositibo iti COVID-19, basar iti inrakurak ti gobyerno probinsyal.
Segun kenni Lorenzo, ti APOR ket agtawen ti 60, senior citizen, ken manager iti Philippine Airlines ken naggapu iti probinsya ti Rizal.
Kuna na a saan a pulos a nakikoordinar ti maseknan kenkuana ken maipagarup a nagdiretso iti subdivision iti sakopen ti barangay da.
Inbatad ni Lorenzo a naamuan na laeng manipud iti maysa a senior citizen ken dita nga inkumpirmar na kenni Dr. Roger Bracerus ket pudno nga adda ti COVID-19 positive nga APOR.
Naamuan pay ti kapitan a simmangpet ti APOR idi Hulyo 1 ken pimmanaw ditoy probinsya idi Hulyo 7 ngem saan na a naamuan no kaano a nagsubli ti maseknan.
Iti maikadua a daras a panagsubli ti APOR ditoy siudad ket dimmalan iti rapid test ken negatibo ti resulta na ngem gapu ta kalikagum na a maamuan ti pudno nga estado ti salun-at na ket dimmalan iti swab test ngem ditoy a nagpositibo.
Kabayatanna, inbatad ni Lorenzo nga inyuswat dagiti health auhtorities ti contact tracing iti subdivision.
Kuna na a ti maysa a nakapulapol ti APOR ket maysa a babai ken nadegdegan ti panagalarma da kalpasan a naamuan da a ti babai ket mahilig a makipulapol iti sabali a tao.
Innayon ni Lorenzo a pinasukon ni Dr. Bracerus ti maseknan ken naipan iti quarantine facility iti barangay da.
Kalikagum ti management ti subdivision a mailockdown daytoy ngem ti plano ket mailockdown iti nagiyanan ti APOR.
