LAOAG CITY – Balligi a nakasubli iti Earth ti Artemis II kalpasan ti pakasaritaan nga splashdown iti baybay iti asideg ti San Diego, California.
Adda iti uneg ti Integrity Capsule ti sibubukel a team, kalpasan ti moon mission da.
Natalged a nakasubli iti Earth dagiti uppat nga astronaut, nga isuda Reid Wiseman, Victor Glover, Christina Koch, ken Jeremy Hansen, kalpasan ti siyam nga aldaw a panagbiyahe da iti lawlaw ti Bolan (Moon) a nagmarka ti baro a chapter iti programa ti NASA Artemis.
Manipod iti kapardas a 23,000 mph (37,000 km/h) iti iseserrek na iti atmospera, bimmayag ti kapsula iti tulong ti multi‑stage parachute system agingga iti 20–30 km/h sakbay a nag-splash down.
Dagus a nagresponde U.S. Navy manipod iti USS John P. Murtha tapno sabaten dagiti crew para iti medikal a panangtingiting ken recovery operations.
Ti misyon ket nagballigi iti gagem a padasen dagiti sistema ti Orion spacecraft ken isaganan iti sumaruno nga addang agturong iti panagdisso na iti bolan (moon).
Iti pakabuklan, umabot iti nasurok nga 400,000 a kilometro ti distansya ti byinahe ti Artemis II, ken nangipaay kadagiti ladawan a naala manipod iti lunar orbit, karaman ti buya ti “Earthset.”
Ti naimballigian a panagsubli ti Artemis II ket simbolo ti baro a namnama iti baro a panawen ti eksplorasyon iti law-ang, maysa a pammaneknek a nakasagana manen ti sangalubungn a pumaddak iti bolan.
