LAOAG CITY – Itultuloy ti prosekusion nga ipresentar ti ebidensia iti babaen ti Article 1 ti impeachment case kontra ken ni Vice President Sara Duerte kalpasan a saan nga umannugot ti depensa ti suhesion nga agsabali ti panagsasaruno ti presentasion.
Ti Article 1 ti impeachment case kontra ken ni VP Sara mainaig ti saan nga umno a panagusar ti P612 million iti confidential funds.
Inbatad ni Senate President Sherwin Gatchalian a nagpakada ti depensa iti impeachment court a kayatda a pagtalinaeden ti katulagan nga agbalin a proseso iti pre-trial order gapu ta kayatda ti patas ken umdas a panawen tapno makasagana.
Naidasar ti dua a dati a branch manager ti Land Bank of the Philippines a mangpaneknek mainaig iti panag-disburse ti agdagup P612 milyon a confidential funds a maipagarup nga inusar ti Duterte idi sekretario daytoy ti edukasion.
Ginutigot met ni Gatchalian ti agsumbangir a kampo ken dagiti senador-judge ti alisto a panagsaludsod tapno malpas ti testimonia ti dua a saksi iti uneg ti lima nga oras.
